Nyota NBA, kocha wakamatwa kwa tuhuma za kucheza kamari

Mchezaji mmoja na kocha wa NBA ni miongoni mwa watu wengi waliokamatwa katika uchunguzi mkubwa wa FBI kuhusu kamari haramu ya michezo na michezo ya poker inayodaiwa kupangwa kwa udanganyifu kwa ushirikiano na mafia.

Mchezaji wa Miami Heat, Terry Rozier, na kocha wa Portland Trail Blazers, Chauncey Billups, wametajwa na waendesha mashtaka wa shirikisho katika mashtaka mawili tofauti yaliyotolewa Alhamisi Oktoba 23, 2025.

Rozier, mwenye umri wa miaka 31, ni miongoni mwa watu sita waliokamatwa kwa tuhuma za udanganyifu katika kamari. Wamo wachezaji wa NBA wanaodaiwa kughushi majeraha ili kuathiri masoko ya kubashiri.

Billups, ambaye ni mchezaji wa zamani aliyeingizwa kwenye Ukumbi wa Heshima (Hall of Fame) na amekuwa akiifundisha Portland tangu 2021, ni miongoni mwa watu 31 wanaoshitakiwa katika kesi tofauti ya michezo ya poker haramu ikihusisha wachezaji wastaafu na wanamafia.

Kesi hiyo, ambayo waendesha mashtaka walisema ilihusisha familia nne kati ya tano kuu za uhalifu mjini New York, ilifichua njama ya kuwavuta wahanga kucheza michezo ya poker iliyopangwa udanganyifu wakiwa na nyota maarufu wa michezo, kisha kuwaibia mamilioni ya dola.

Walitumia teknolojia maalum kama lenzi za mawasiliano na miwani iliyoweza kusoma kadi zilizowekwa alama mapema, pamoja na meza maalum ya eksirei iliyoweza kuona kadi hata zikiwa zimefunikwa.

Katika taarifa, NBA imesema Rozier na Billups wameondolewa kwa muda kazini wakati ligi inachunguza mashtaka hayo ya shirikisho.

“Tunachukulia tuhuma hizi kwa uzito mkubwa, na uadilifu wa mchezo wetu unabaki kuwa kipaumbele chetu kikuu,” taarifa imesema.

Wakili wa Rozier alikanusha tuhuma hizo kwa CBS News, akisema: “Terry si mcheza kamari, lakini si mtu wa kuogopa mapambano. Anatazamia kushinda kesi hii.”

Rozier alifikishwa mahakamani mjini Orlando, Florida, siku ya Alhamisi Oktoba 23, 2025 na kuachiwa kwa dhamana baada ya kuweka nyumba yake ya Florida yenye thamani ya dola milioni 6 kama dhamana.

Billups alikamatwa mjini Portland, Oregon, na kufikishwa mahakamani siku hiyo hiyo. Inaripotiwa kuwa naye ataweka dhamana kubwa ili kuachiwa.

Mkurugenzi wa FBI, Kash Patel, amefanya mkutano na waandishi wa habari mjini Brooklyn, New York, akitangaza mashtaka hayo mawili, akiyaita ukamataji wa kipekee ulioratibiwa katika majimbo 11.

“Tunazungumzia ulaghai, wizi, na uporaji wa mamilioni ya dola katika uchunguzi uliochukua miaka kadhaa,” amesema.

Mwendesha mashtaka wa Marekani wa Wilaya ya Mashariki ya New York, Joseph Nocella Jr, amesema watuhumiwa wote ni wasio na hatia hadi watakapothibitishwa vinginevyo, lakini akaonya:

“Bahati yenu imekwisha, mchezo umeisha.”

Waendesha mashtaka walisema kesi ya kwanza inahusisha wachezaji na washirika waliotumia taarifa zisizojulikana kwa umma kuweka bashiri kwenye majukwaa makubwa ya kamari.

Nocella aliita hili moja ya sakata kubwa zaidi za rushwa kwenye michezo tangu kamari ya mtandaoni ilipoidhinishwa kisheria.

Mechi saba za NBA kati ya Februari 2023 na Machi 2024 zimetambuliwa kuwa sehemu ya uchunguzi huo. Rozier anadaiwa kushiriki katika moja kati ya Charlotte Hornets na New Orleans Pelicans wakati akiwa mchezaji wa Hornets.

Rozier anadaiwa kumwambia rafiki yake kuwa angeondoka uwanjani mapema kutokana na jeraha. Rafiki huyo na washirika wake waliweka bashiri zenye thamani ya zaidi ya dola 200,000 kwamba Rozier angecheza chini ya matarajio. Rozier aliondoka baada ya dakika tisa tu, na washirika wake wakapata maelfu ya dola kutokana na ushindi huo wa kamari.

Ripoti rasmi ya NBA imesema Rozier alicheza dakika tisa na kupata pointi tano pekee kutokana na maumivu ya mguu wa kulia tofauti na wastani wake wa dakika 35 na pointi 21 kwa mchezo kabla ya hapo.

Kamishna wa Polisi wa Jiji la New York, Jessica Tisch, amesema: “Kadiri msimu wa NBA unavyoanza, kazi yake imesimamishwa si kwa jeraha, bali kwa uadilifu.”

Mashtaka ya pili yanawahusisha watu 31 wanaodaiwa kushiriki katika njama ya kupanga michezo ya poker haramu na kuiba mamilioni ya dola.

Kesi hiyo ilihusisha wanachama na washirika 13 wa familia za kihalifu za Bonanno, Genovese, na Gambino za New York.

Waendesha mashtaka walisema wahanga walivutwa kucheza michezo hiyo na wachezaji wa zamani wa michezo kama Billups na Damon Jones huko Las Vegas, Miami, Manhattan, na Hamptons.

Wahanga walipoteza maelfu hadi mamia ya maelfu ya dola kwa kila mchezo. Washitakiwa walitumia mashine maalum za kuchanganya kadi zilizorekebishwa, lenzi maalum na miwani ya kusoma kadi, pamoja na meza ya eksirei iliyoweza kuona kadi zilizogeuzwa.

Nocella amesema: “Kile ambacho wahanga hawakujua ni kwamba kila mtu kwenye meza kuanzia msambazaji hadi wachezaji, alikuwa sehemu ya njama.”

Tisch aliongeza kuwa wale waliokataa kulipa walitishiwa au kulazimishwa na wanamafia kutoa fedha zao.

Mashtaka yanajumuisha wizi, unyang’anyi, ulaghai wa benki na mawasiliano, na kamari haramu.

Njama hiyo inadaiwa kuwaibia wahanga jumla ya dola milioni 7, huku mmoja akipoteza dola milioni 1.8.

Afisa msaidizi wa FBI, Christopher Raia, amesema: “Hii ni ncha tu ya barafu. Tunaendelea kuhakikisha familia hizi za uhalifu haziendelei kuvuruga jamii zetu.”