Iran yalindwa na askari 300 ikicheza Marekani

LOS ANGELES, MAREKANI: MAMLAKA za Mexico zimeweka kikosi maalumu cha askari wapatao 300 kutoka Jeshi na Kikosi cha Taifa cha Ulinzi (National Guard) kwa ajili ya kuhakikisha usalama wa timu ya taifa ya Iran wakati wa ushiriki wake katika Kombe la Dunia 2026.

Hatua hiyo imekuja wakati ambapo Iran imekuwa moja ya timu zilizopo kwenye mijadala kabla na wakati wa michuano hiyo kutokana na mvutano wa kisiasa na kijeshi unaoendelea kati ya Iran na Marekani pamoja na washirika wake wa Magharibi.

Hali hiyo imezilazimu mamlaka za Mexico, ambako Iran imeweka kambi yake ya maandalizi katika mji wa Tijuana, kuchukua tahadhari za hali ya juu ili kuhakikisha kikosi hicho kinakuwa salama wakati wote wa mashindano.

Kwa mujibu wa taarifa zilizoripotiwa na vyombo mbalimbali vya habari vya Mexico, askari hao wamepewa jukumu la kusimamia usalama wa timu hiyo kuanzia hotelini, mazoezini, safari za kuelekea viwanjani hadi maeneo ya umma wanayotembelea wachezaji na viongozi wa timu hiyo.

Tahadhari hizo zimeongezeka hasa baada ya kuzuka kwa hofu ya maandamano, vitisho vya kiusalama na hisia kali kutoka kwa baadhi ya makundi kufuatia kuongezeka kwa mvutano wa kidiplomasia kati ya Tehran na Washington katika kipindi cha kuelekea Kombe la Dunia.

Mvutano huo uliongezeka zaidi kufuatia mfululizo wa matukio ya kijeshi na kisiasa yaliyotokea Mashariki ya Kati katika miezi ya hivi karibuni, jambo lililoifanya Iran kuwa moja ya mataifa yaliyokuwa yakifuatiliwa kwa karibu zaidi wakati wa michuano hiyo.

Awali kulikuwa na mjadala mkubwa kuhusu namna timu ya Iran ingeweza kuingia Marekani na kushiriki Kombe la Dunia kutokana na uhusiano mbaya wa muda mrefu kati ya mataifa hayo mawili, ambao umeendelea kwa zaidi ya miongo minne tangu Mapinduzi ya Kiislamu ya mwaka 1979.

Ingawa Marekani ni mmoja wa wenyeji wa Kombe la Dunia 2026, FIFA na mamlaka za nchi mwenyeji zilihakikisha Iran inapata fursa ya kushiriki mashindano hayo kwa mujibu wa kanuni za kimataifa za michezo zinazotaka mataifa yote yaliyofuzu kushiriki bila ubaguzi wa kisiasa.

Kutokana na mazingira hayo, Iran ilichagua kuweka kambi yake nchini Mexico badala ya Marekani huku Tijuana ikitumika kama kituo kikuu cha maandalizi kabla ya kusafiri kwenda kwenye miji inayocheza mechi zake.

Picha mbalimbali zimeonyesha mabasi ya timu hiyo yakisindikizwa na magari ya National Guard pamoja na vikosi vya usalama vilivyokuwa vikiratibu harakati zote za timu hiyo kwa saa 24.

Iran imeanza kampeni yake ya Kombe la Dunia kwa sare ya mabao 2-2 dhidi ya New Zealand katika mchezo wa Kundi G uliochezwa jijini Los Angeles, matokeo yaliyowapa pointi ya kwanza kwenye kundi linalojumuisha pia Ubelgiji na Misri.

Wachambuzi wa masuala ya usalama wanaamini uwepo wa askari hao 300 umeipa Iran utulivu wa kufanya maandalizi na kushiriki mashindano bila presha ya masuala ya kisiasa yanayoendelea duniani.

Kwa wengi, hatua ya Mexico imeonekana kama mfano wa namna michezo inaweza kuendelea kuwa sehemu ya kuunganisha mataifa tofauti licha ya migogoro ya kisiasa inayoweza kuwepo kati ya serikali zao.