Japan yaigomea Uholanzi Kombe la Dunia

JAPAN imeukataa unyonge baada ya kutoka nyuma mara mbili na kulazimisha sare ya mabao 2-2 dhidi ya Uholanzi katika mchezo wa Kundi F wa Kombe la Dunia 2026 uliochezwa usiku wa kuamkia leo, Jumatatu  kwenye Uwanja wa Dallas nchini Marekani.

Mchezo huo uliokuwa wa kuvutia hasa kipindi cha pili uliwashuhudia Wajapani wakikataa kukubali kipigo mbele ya moja ya timu zinazotajwa kuwa miongoni mwa vigogo wa soka duniani.

Baada ya kipindi cha kwanza kumalizika bila mabao, Uholanzi walikuwa wa kwanza kupata bao dakika ya 51 kupitia beki na nahodha wao Virgil van Dijk.

Hata hivyo, furaha ya Uholanzi haikudumu kwa muda mrefu baada ya Japan kusawazisha dakika ya 57 kupitia Keito Nakamura aliyemalizia vizuri pasi ya nyota wao Takefusa Kubo.

Bao hilo liliwarudisha Wajapani mchezoni na kuongeza ushindani. Uholanzi walionekana kurejesha umiliki wa mchezo dakika ya 64 pale Crysencio Summerville alipofunga bao la pili.

Bao hilo lilionekana kuwapa Waholanzi matumaini ya kuondoka na pointi zote tatu muhimu katika mchezo wao wa ufunguzi wa kundi hilo.

Lakini Japan hawakuwa tayari kukata tamaa. Kocha Hajime Moriyasu alifanya mabadiliko kadhaa ya kimkakati katika kipindi cha pili, hatua iliyobadili kabisa sura ya mchezo.

Dakika ya 88, Japan walisawazisha kwa mara nyingine kupitia Daichi Kamada  na kupeleka shangwe kwa mashabiki wa Japan.

Bao hilo liliwaacha Waholanzi wakijilaumu kwa kushindwa kulinda uongozi wao mara mbili ndani ya mchezo mmoja.

Kwa mujibu wa takwimu, Uholanzi hawajawahi kushindwa kushinda mchezo wa Kombe la Dunia walipoanza kuongoza kwa mabao mawili tofauti katika nyakati mbalimbali za mchezo, jambo linalofanya sare hiyo kuwa ya maumivu kwao.