CHAN 2024: Makocha Kenya wakubali kiwango

KOCHA wa timu ya Tusker, Charles Okere na wa City Stars, Salim Babu pamoja na yule wa Bidco, Anthony Akhulia wamesema kuwa kiwango cha Harambee Stars katika michuano ya mataifa ya Afrika kwa Wachezaji wa Ndani (CHAN 2024) ni ishara kwamba soka la Kenya linaanza kupata mwelekeo mpya.

Harambee Stars ilionyesha kiwango bora, wakiongoza Kundi A wakiwa na pointi 10, bila kufungwa huku wakiruhusu bao moja.

Walishinda 1-0 dhidi ya DR Congo, Morocco na Zambia na kutoa sare ya 1-1 dhidi ya Angola. Matokeo hayo yaliwafanya kufuzu robo fainali, ambapo walishindwa kwa mikwaju ya penalti 4-3  dhidi ya Madagascar, ikimaliza safari yao ya kihistoria kwenye mashindano hayo.

Okere alisema: “Kile ninachoona katika Harambee Stars ni cha kuponya moyo. Mara ya kwanza baada ya muda mrefu, unaweza kuona mpangilio wa kiasili wa mchezo, mabadiliko ya kikosi kwa mpangilio mzuri, na kikosi kinachoelewa majukumu yake uwanjani.”

Aliongeza kuwa kocha Benni McCarthy amejenga nidhamu na imani kuwa timu inaweza kushindana na vigogo wa Afrika. “Ishara hii ya imani ilikuwa ikikosekana kwa miaka mingi,” alisema.

Salim Babu aliongeza kuwa timu hiyo ina kujiamini, kuandaliwa vizuri, na imekabiliana na changamoto zote bila hofu. Alifafanua namna McCarthy anavyotumia mizunguko ya wachezaji bila kudhoofisha timu, badala yake kuongeza nguvu na ari ya ushindani.

Anthony Akhulia aliongeza kuwa ujasiri wa McCarthy ni zawadi kubwa kwa timu. “Haogopi kuweka mchezaji mkubwa benchi ikiwa hali inahitaji, wala haogopi kumwamini mchezaji mdogo katika mchezo muhimu. Hii ni somo kwa kocha wote wa Kenya,” alisema.

Aliongeza kuwa ujumbe huu ni chachu kwa vijana wa Kenya, kuonyesha kwamba nidhamu na bidii zinaweza kupelekea nafasi ya taifa hata kwa wachezaji wachanga.