Man United ya Carrick yaichapa Man City 2-0
Muktasari:
- Mashabiki wa Man United waliimba jina la Carrick kwa wimbo Magic wa Pilot, na alasiri yao pale Old Trafford kwa hakika ilikuwa ya kichawi.
MANCHESTER, ENGLAND: MICHAEL Carrick aliwahi kusema bado kuna “uchawi” ndani ya Manchester United.
Mashabiki wa Man United waliimba jina la Carrick kwa wimbo Magic wa Pilot, na alasiri yao pale Old Trafford kwa hakika ilikuwa ya kichawi.
Carrick amerejea kwa chini ya wiki moja tu na tayari anahusika na kiwango bora zaidi cha Man United msimu huukwa uchezaji, hali ya hewa ya mashabiki, na nafasi ya ligi. Na hilo limechochewa utamu zaidi kwa ushindi wa mabao 2-0 dhidi ya mahasimu wao Manchester City kwenye mchezo wa Ligi Kuu England.
Alikuwa na bahati ya kurithi kikosi chenye wachezaji wawili tu walioumia, hali iliyoboreshwa zaidi na kurejea kwa Bryan Mbeumo na Amad.
Mbeumo alifunga bao la kwanza katika mechi yake ya kwanza baada ya mwezi mmoja wa kuwa mbali na kikosi. Hakika Man United inapumua kwa afueni baada ya Cameroon kutolewa kwenye Kombe la Mataifa ya Afrika (AFCON) wiki iliyopita na Mbeumo kurudi kikosi, kama ilivyotokea kwa Amad, ambaye alikuwa kwenye kikosi cha Ivory Coast katika mashindano hayo ya ubingwa wa Afrika yanayoendelea huko Morocco.
Huu ni ushindi wa kwanza Old Trafford dhidi ya Man City tangu Januari 2023 huku matokeo hayo yakipandisha Man United hadi nafasi ya nne kwa muda.
Kwa upande wa Man City, matumaini yao ya kurejesha taji kutoka kwa Arsenal imara yanazidi kuyeyuka kwa kasi. Ilikuwa kama muujiza mdogo kwa Man City kuruhusu bao moja tu, huku Gianluigi Donnarumma akiwa karibu kutopitika hadi Mbeumo alipomzidi kwa shuti safi dakika ya 65.
Mchana wao ulionekana wazi kupitia ulinzi wa usingizi wa Rico Lewis kwenye bao la pili lililofungwa na Patrick Dorgu dakika ya 76.
Lewis alidhani krosi ya Matheus Cunha ingetua kwake na hakuwa kabisa makini na uwepo wa Dorgu aliyenyemelea kimya kimya. Licha ya safu ya ulinzi ya Man City kuwa dhaifu kwa sasa, safu yao ya ushambuliaji haikuonekana kabisa. Phil Foden alicheza dakika 45 tu, Erling Haaland alizuiwa vyema na Man United walimzuia Antoine Semenyo asifunge. Kipindi cha kwanza kilichosisimua kwa namna fulani kilimalizika bila bao.
Harry Maguire, akianza kwa mara ya kwanza baada ya miezi miwili, alikaribia kufunga kwa kichwa dakika ya tatu kutokana na kona kali ya Bruno Fernandes. Mbeumo, akiongoza safu ya ushambuliaji kama Namba 9 bandia na mtindo huo wa kocha Carrick ulizaa matunda. Dorgu alihitimisha alasiri ya kukumbukwa kwa Carrick na mashabiki Man United waliokuwa wakiimba jina la kocha huyo wa muda.
