Kilichomponza Kijuso hiki hapa
Muktasari:
- Kijuso alifikia uamuzi huo ikiwa ni baada ya timu hiyo kuchapwa mabao 3-0 na ‘Chama la Wana’ Stand United Desemba 20, mwaka huu kwenye Uwanja wa Kambarage mjini Shinyanga hivyo, kujiweka pembeni na kikosi hicho.
ALIYEKUWA kocha wa Cosmopolitan, Mohamed Kijuso amesema sababu za kufikia makubaliano ya pande mbili ya kuachana na timu hiyo ni kutokana na mwenendo mbaya, ingawa hajashindwa kutengeneza kikosi bora kinachoweza kuleta ushindani msimu huu.
Kijuso alifikia uamuzi huo ikiwa ni baada ya timu hiyo kuchapwa mabao 3-0 na ‘Chama la Wana’ Stand United Desemba 20, mwaka huu kwenye Uwanja wa Kambarage mjini Shinyanga hivyo, kujiweka pembeni na kikosi hicho.
“Ni makubaliano ya pande mbili kwa sababu hakuna jinsi zaidi ya hapo tulipofikia, nawashukuru viongozi kwa nafasi hiyo waliyonipa na nawaombea wafanye vizuri katika michezo iliyobaki, naamini wana wachezaji wenye uchu wa mafanikio.”
Kijuso msimu huu hadi anaondoka ndani ya kikosi hicho amekiongoza katika michezo 13 ya Ligi ya Championship, ambapo kati yake ameshinda miwili, sare miwili na kupoteza tisa, akikiacha kikiwa nafasi ya 14, kwenye msimamo na pointi nane.
Makocha wengine walioondoka kwa sababu mbalimbali ni Mussa Rashid wa Biashara United, Twaha Beimbaya (Kiluvya United), Meja Mstaafu Abdul Mingange (Stand United), Ivo Mapunda (Songea United) na Ally Ally (Transit Camp).
