Urembo unavyoweza kugeuka maradhi
Ni jambo la kawaida kukuta marafiki wakiazimana taulo, kifaa cha kutengeneza kucha au hata vifaa vya kujipambia. Wengine hufanya hivyo saluni, nyumbani au wanapokuwa katika shughuli mbalimbali za kijamii. Kwa wengi, kitendo hicho huonekana cha kawaida na kisicho na madhara yoyote.
Hata hivyo, wataalamu wa afya wanaonya kuwa kushirikiana vifaa vya urembo kunaweza kuwa chanzo cha maambukizi ya magonjwa mbalimbali yanayoathiri ngozi, nywele na sehemu nyingine za mwili.
Hali hiyo hutokea pale vifaa hivyo vinapotumiwa na mtu mmoja baada ya mwingine bila kusafishwa vizuri.
CHANZO CHA FANGASI
Moja ya magonjwa yanayoweza kusambazwa kwa urahisi ni fangasi wa ngozi. Ugonjwa huu huweza kuathiri sehemu mbalimbali za mwili ikiwemo kichwani, mikononi, miguuni na hata kwenye kucha.
Mtu mwenye maambukizi ya fangasi anapotumia taulo au kifaa kingine cha urembo, vijidudu vinaweza kubaki kwenye kifaa hicho na kuhamia kwa mtu mwingine atakayekitumia baadaye.
Mbali na fangasi, pia kuna maambukizi ya bakteria ambayo yanaweza kusababisha vipele, majipu na muwasho wa ngozi. Watu wengi hupenda kuazimana vifaa vya kujiremba bila kujua kuwa baadhi ya bakteria wanaweza kuishi kwa muda kwenye vifaa hivyo.
Hali hiyo huongeza uwezekano wa kuenea kwa maambukizi kutoka kwa mtu mmoja kwenda kwa mwingine.
Hatari nyingine ipo kwenye matumizi ya taulo za pamoja. Taulo hutumika kufuta jasho, maji na wakati mwingine hufuta sehemu zenye vijidonda vidogo visivyoonekana kwa urahisi.
Taulo moja inapotumiwa na watu wengi bila kufuliwa na kukaushwa vizuri, inaweza kuwa sehemu ya kusambaza vijidudu mbalimbali vinavyosababisha magonjwa ya ngozi.
CHANZO CHA MBA
Kwa upande wa nywele, matumizi ya chanuo la pamoja yanaweza kuchangia kuenea kwa chawa.
Ingawa baadhi ya watu huona chawa kama tatizo dogo, ukweli ni kwamba huweza kusababisha muwasho mkali, vidonda kichwani na usumbufu mkubwa katika maisha ya kila siku.
Watoto na vijana ndiyo huathirika zaidi kutokana na tabia ya kubadilishana vitana shuleni na maeneo mengine ya mikusanyiko.
CHUNUSI
Wanawake wanaopenda kujipamba pia wanapaswa kuwa makini wanapotumia vifaa vya kujiremba vinavyotumiwa na watu wengi.
Vifaa kama brashi za kupaka vipodozi vinaweza kubeba uchafu, mafuta ya ngozi na bakteria ambao baadaye husababisha matatizo mbalimbali usoni.
Wakati mwingine mtu anaweza kupata vipele au chunusi nyingi bila kufahamu kuwa chanzo chake ni kifaa cha kujiremba kilichotumiwa na watu wengine.
Kadhalika, vifaa vya kutengeneza kucha vinaweza kuwa hatari ikiwa havisafishwi ipasavyo. Wakati wa kutengeneza kucha, ngozi inaweza kupata michubuko midogo isiyoonekana kwa macho.
Michubuko hiyo huweza kuwa njia ya kuingilia kwa vijidudu vinavyosababisha maambukizi mbalimbali.
WASIKIE WATAALAMU
Wataalamu wa afya wanashauri kila mtu kuwa na vifaa vyake binafsi vya urembo inapowezekana.
Machanuo, taulo, kifaa cha kunyoa nywele na vifaa vya kutengeneza kucha vinapaswa kuwa vya matumizi binafsi ili kupunguza hatari ya kuambukizana magonjwa.
Pia ni muhimu kusafisha vifaa vya urembo mara kwa mara kwa kutumia maji safi na sabuni. Vifaa vinavyotumika saluni vinapaswa kutakaswa baada ya kila mteja ili kuhakikisha havisambazi maambukizi kutoka kwa mtu mmoja kwenda kwa mwingine.
Kwa upande wa vipodozi, wataalamu wanashauri kuepuka kuazimana bidhaa zinazogusana moja kwa moja na ngozi au macho. Kila mtu anapaswa kutumia vifaa na vipodozi vyake ili kujilinda dhidi ya maambukizi yasiyo ya lazima.
Wakati mwingine watu huweka nguvu kubwa katika kutafuta uzuri wa mwonekano wa nje lakini husahau kulinda afya zao. Ni muhimu kufahamu kuwa urembo wa kweli huenda sambamba na afya bora.
Kabla ya kuazima au kuazimisha kifaa chochote cha urembo, fikiria kwanza athari zinazoweza kujitokeza.
Hatua ndogo ya kuwa makini leo inaweza kukuepusha na matatizo makubwa ya kiafya kesho.
