Yanga yaichapa Stand United, Kitenge apiga 'hat-trick'
Muktasari:
- JKT Tanzania ndio vinara kwenye msimamo wa Ligi Kuu Bara, wanaongoza wakiwa na pointi nane.
Dar es Salaam. Kikosi cha Yanga kimeibuka na ushindi wa mabao 4-3, dhidi ya Stand United katika mchezo uliopigwa Jumapili ya Septemba 15, Uwanja wa Taifa jijini Dar es Salaam, huku mshambuliaji wa Chama la Wana, Alex kitenge akiweka rekodi ya kufunga 'hat-Trick' kwanza msimu huu.
Katika mchezo huo uliokuwa na ushindani, Yanga walikuwa wa kwanza kupachika bao kupitia kwa mshambuliaji wao, Mrisho Ngassa dakika ya 2, akiunganisha pasi ya Ibrahim Ajib. Ajib 'aliuchopu' mpira akiwa mbele kidogo ya dimba la kati na kuwafanya mabeki wa Stand wabaki wakiushangaa, ndipo Ngassa akatokea pembeni na kupiga bao hilo ambalo ni la kwanza kwake tangu ajiunge Yanga msimu huu.
Ngassa ameingia kwenye rekodi ya mshambuliaji wa Simba, Mnyarwanda Meddie Kagere ambaye alikuwa anashikilia rekodi ya kupachika bao la mapema msimu huu alilofunga dakika kama hiyo ya pili.
AJIB ATETEA MKATABA WAKE YANGA
Alex Kitenge aliisawazashia bao Stand United dakika ya 15, akipokea pasi kutoka kwa Sixtus Sabilo na kuunganisha moja kwa moja huku Mkongo Klaus Kindoki akibaki anashangaa.
Mpira ulibadilika na kushambuliana kwa zamu na stand United wakionekana kukomaa tofauti na ilivyo katika dakika 10, za mwanzo.
Stand United walitumia zaidi nafasi ya upande wa kulia kama njia alipokuwa anacheza, Paul Godfrey kijana kutoka timu yao ya vijana. Yanga walipata bao la pili dakika 32, likifungwa na Ibrahim Ajib kwa shuti kali lililokwenda moja kwa moja wavuni.
Bao hilo lilifanya mashabiki waanze kufurahi kuwa mchezaji huyo amerudi kwenye kiwango tofauti na mwanzo na dakika ya 35, beki wa kati, Andrew Vincent aliifungia timu yake bao la tatu kwa kisigino baada ya mabeki wa Stand kujichanganya.
Na ilipofika dakika ya 57, winga Deus Kaseke alipachika bao la nne na mwisho kwao.
ALEX KITENGE ANG'ARA, APIGA 'HAT-TRICK'
Katika mchezo huo, unaweza kusema ulikuwa ya Alex kitenge wa Stand United ambaye alifunga mabao yote matatu 'hat- trick' na kuweka rekodi msimu huu.
Alipachika bao la pili dakika ya 59, kabla ya kupiga la tatu dakika ya 90 na mechi ilipokwisha, alikabidhiwa mpira wake.
STAND WABISHI KINOMA
Dakika zilivyozidi kwenda mbele, Stand United licha ya kuwa nyuma kwa mabao 4-3, wachezaji wao walizidi kuwakomalia Yanga.
Presha waliyoipeleka katika safu ya ulinzi ya Yanga iliwafanya mabeki Kelvin Yondani na Andrew Vicent wajichanganye mara kwa mara.
Kindoki alizua tafrani kwa mashabiki baada ya kushindwa kuonyesha kiwango cha juu na Stand United walicheza kama hawajapoteza, walitengeneza nafasi na kutulia.
Mabadiliko ambayo walifanya Yanga kwa kumtoa Mrisho Ngassa na Ibrahim Ajib hayakuwa na faida kwa Yanga kwami Yusuph Mhilu na Raphael Daud ambao waliingia mpira ulipoa tofauti na awali.
Msimamo wa Ligi Kuu Bara 2018-2019
P W D L F A PTS
1. JKT Tanzania 4 2 2 0 3 1 8
2. Azam FC 3 2 1 0 6 1 7
3. Simba SC 3 2 1 0 3 0 7
4. Mtibwa Sugar4 2 1 1 4 3 7
5. Mbao FC 4 2 1 1 3 2 7
6. Singida United 4 2 1 1 2 1 7
7.Yanga SC 2 2 3 0 6 3 6
8. Coastal Union 4 1 3 0 3 2 6
9. Stand United 4 2 0 2 6 6 6
10. Kagera Sugar 3 1 2 0 2 1 5
11.Prisons 4 1 1 2 4 4 4
12.Biashara United 4 1 1 2 1 2 4
13.Ndanda 4 1 1 2 1 4 4
14.Lipuli FC 3 0 3 0 2 2 3
15.KMC FC 4 0 3 1 2 3 3
16.African Lyon 4 0 3 1 1 2 3
17.Mbeya City 4 1 0 3 3 6 3
18.Ruvu Shooting3 0 2 1 3 4 2
19.Mwadui FC 3 0 1 2 2 4 1
20.Alliance FC 3 0 1 3 1 6 1
