Simba kama mlivyosikia Z’bar

Monday January 8 2018

 

By THOBIAS SEBASTIAN

Zanzibar. Simba imeaga mashindano ya Kombe la Mapinduzi baada ya kuchapwa bao 1-0 na URA katika mchezo wa mwisho wa Kundi A.

Katika mchezo huo Simba ilikuwa ikihitaji ushindi ili kusonga mbele, lakini kukosa umakini kwa safu ya ulinzi kulitoa mwanya kwa mshambuliaji wa URA,  Deboss Kalama kuwafunga bao la kujuhudi binafsi baada ya kuwazidi mbio mabeki kabla ya kupiga shuti lililokwenda moja kwa moja wavuni katika dakika 45.

Katika mchezo huo Simba ilionekana kucheza bila ya kuwa na ushirikiano baina uwanjani jambo lililotoa mwanya kwa URA kuonekana kuwa wako bora zaidi kila walipokuwa wakienda langoni mwa wapinzani wao.

Kocha wa Simba, Djouma Masoud atabidi afanya kazi ya ziada kurudisha nidhamu ya timu baada ya wachezaji wake wawili  Shiza Kichuya na Jonas Mkude kuondoka katika benchi muda mfupi baada ya kutolewa uwanjani wakionyesha kupiga kitendo hicho.

Kutokana na kitendo hicho baadhi ya viongozi wa Simba, Afisa Habari, Haji Manara na Said Tuli walitumia muda kuwabembeleza wachezaji hao baada ya kutolewa nje.

Katika mchezo huo uliokuwa na ushindani, Simba ilifanya mashambilizi ya mara kwa mara kupitia kwa John Bocco 'Adebayor dakika 30 na lile la dakika ya 75 la piga nikupige kati ya Bocco, Asante Kwasi na Ibrahim Mohamed 'Mo' mpira ukatoka nje.

Kwa matokeo hayo, Simba itawabidi warudi jijini Dar es Salaam au waendelee kukaa kisiwani hapo kwa ajili ya maandalizi ya mashindano mengine ya ligi kuu pamoja na Kombe la Shirikisho.

Nusu fainali ya mashindano hayo, itachezwa kesho kutwa Jumatano na utaanza mchezo kati ya URA na Yanga saa 10:30 jioni na Azam itakipiga na Singida United saa  02:15 usiku katika uwanja huo huo wa Amaan.

Hata hivyo, katika mchezo huo, mchezaji wa URA, Mutyaba Julius amechaguliwa kuwa mchezaji bora.


Azam waingia nusu fainali, waifunga Simba bao 1-0

Saturday January 6 2018

 

By By THOBIAS SEBASTIAN

MABINGWA watetezi wa Kombe la Mapinduzi kikosi cha Azam FC, kimeingia hatua ya nusu fainali ya mashindano hayo baada ya kuifunga Simba bao 1-0.

Azam imeshinda mchezo huo wa kundi A, uliochezwa Uwanja wa Amaan, Kisiwani Zanzibar na bao lao likifungwa na Idd Kipabwile dakika ya 59, akiunganisha pasi ya Frank Domayo 'Chumvi'.

Domayo aliingia dakika 55 kipindi cha pili kuchukua nafasi ya  Yahya Zayd  na dakika nne baadaye akatoa pasi ya bao hilo.

Mechi hiyo iliyochezwa kwa nguvu na kibabe, inakuwa ya  nne kwa Azam ambayo imemaliza michezo yao ya hatua ya makundi na watatu kwa Simba  itakayokutana na  URA ya Uganda Jumatatu.

Azam imepita na pointi tisa,  wameshinda mechi tatu na kufungwa moja wakati Simba ina pointi nne, imeshinda mmoja, sare mmoja na imefungwa mmoja.

Simba inatakiwa kuifunga URA katika mchezo huo ujao, kama inataka kusonga mbele kwani URA ina pointi saba na wao kama watashinda watafikisha saba, kitakachoangaliwa ni idadi ya mabao ya kufunga na kufungwa.

Nahodha wa Simba, John Bocco amesema: "Tumecheza vizuri lakini haikuwa bahati yetu, tumecheza kwa nguvu na kwa kujituma lakini ndiyo hivyo.

Kuhusu kuaga mashindano hayo Bocco amesema, wanachohitaji ni pointi tatu na hivyo wanakwenda kujiandaa kwa ajili ya kuifunga URA.

Katika mchezo huo, mlinda mlango wa Azam, Mghana Razack Abalora, ametangazwa kuwa mchezaji bora wa mechi (Man of the Match).


Clement Sanga aibuka kidedea mwenyekiti Bodi ya Ligi

Sunday October 15 2017

 

By Thobias Sebastian

Mgombea Clement Sanga ameibuka mshindi wa nafasi ya mwenyekiti kwenye Uchaguzi wa Kamati ya Uongozi ya Bodi ya Ligi Kuu Tanzania (TPLB) uliofanyika kwenye Ukumbi wa Uwanja wa Taifa jijini Dar es Salaam leo Jumapili.

Sanga ameshinda nafasi hiyo ya mwenyekiti baada ya kupata kura 10, huku akimwangusha Ahmed Yahya aliyepata kura sita kati ya jumla ya kura 16 za wapigakura.

Awali, Yahya ndiye aliyekuwa  akiishikilia nafasi hiyo kabla ya kujiuzulu ili kupisha mchakato huo kufanyika na kumpata mwenyekiti mpya.


Simbu adai matokeo ya Berlin Marathon hayamshangazi

Monday September 25 2017

 

By Yohana Challe

Mwanariadha Alphonce Simbu ameeleza kuwa matokeo ya jana kwenye mashindano ya riadha ya Berlin Marathon ndio yanaonesha ushindani wa mchezo huo duniani.

Mkenya Eliud Kipchoge aling’ara  kwa kushika nafasi ya kwanza kwa kutumia muda wa saa 2:03:32 akifutwa na Guye Adola aliyetumia muda wa saa 2:03:46 akifutwa na Mthiopia mwenzake Mosinet Geremew aliyetumia muda wa saa 2:06:09.

Simbu amesema michuano hiyo inayofanyika Ujerumani yanawasaidia wanariadha wengine kujitathmini ni namna gani wameiva kulinganisha na washiriki hao.

 “Mashindano ni vita maana huwezi kujua mwenzako anatumia silaha gani ndivyo kwenye riadha huwezi kujua mpinzani wako anatumia mbinu gani kukuangamiza,” alisema Simbu.

Hata hivyo Kipchoge ameshindwa kuvunja rekodi ya Mkenya mwenzake, Denis Kimeto aliyoiweka Septemba 28 mwaka 2014 kwa kukimbia muda wa saa 2:2:57.


Timu tatu zachanua Ligi Daraja la Kwanza

Monday September 25 2017

 

By CHARLES ABEL

KASI ya KMC, JKT Ruvu na Dodoma FC zimekuwa tishio katika Ligi Daraja la Kwanza (FDL)  lakini bado imeonekana kuwa sio tishio mbele ya Kocha wa Mshikamano, Abdul Mingange anayeamini timu hizo bado zina safari ndefu.

Timu hizo tatu zimeibuka na ushindi mfululizo kwenye mechi zao mbili za awali za FDL zikiwania kupanda Ligi Kuu msimu ujao, hata hivyo Mingange alisema  ni mapema kuanza kuzitabiri kwa sasa kwa mechi mbili za kwanza.

"Ni kweli zinafanya vizuri na katika ligi hii jambo la msingi ni kupata pointi tatu muhimu, lakini binafsi naamini ligi hii ni ndefu na kuna idadi kubwa ya mechi zimebakia mbele ya safari kwa kila timu.

Unaweza kukuta timu nyingine zinabadilika na kufanya vizuri zaidi hapo baadaye na zikafanikiwa kupanda. Ni mapema mno kuziona hizo timu zimeshapanda kwa kuangalia matokeo ya mechi mbili," alisema Mingange.

Akitolea mfano wa kundi lake, Mingange alisema sio gumu kama wengi wanavyohisi kwani linajumuisha timu anazozifahamu vizuri.


Mulamu ni Tanzania Kwanza

Tuesday August 8 2017

 

MULAMU Ngh’ambi anayegombea nafasi ya Makamu Rais, amesisitiza kwamba kamwe hawezi kuipendelea klabu yake ya Simba endapo atafanikiwa kuingia madarakani na kipaumbele chake ni Tanzania Kwanza, mengine baadaye.

Uchaguzi huo wa TFF utafanyika Jumamosi katika ukumbi wa St. Gasper mjini Dodoma ukiwahusisha wagombea 64 ambao wanagombea nafasi ya Rais, Makamu Rais, wajumbe 13 wa Kamati ya Utendaji.

Mulamu anagombea nafasi hiyo pamoja na Michael Wambura ambaye pia ni mdau mkubwa wa Simba na aliwahi kuongoza Simba na TFF , Mtemi Ramadhan, Robert Selasela na Stephen Mwakibolwa.

Mulamu mbaye pia ni Mwenyekiti wa Chama cha Soka Mkoa wa Dodoma (Dorefa), alizindua kampeni hizo za siku tano jijini Dar es Salaam jana Jumatatu huku akiwa tayari kuachia madaraka ya Dorefa kama ataingia TFF.

“Niliishawaambia hawa wajumbe wa Kamati ya Utendaji ya Dorefa kwamba nikifanikiwa huku basi kule nitaachia madaraka kama BMT (baraza la michezo) lilivyoelekeza ingawa tayari mimi maamuzi hayo nilikuwa nayo kabla,” alisema.

“Pia wapenzi wa soka wasiwe na hofu juu ya mimi kuingia kwangu TFF kwamba kunaweza kuziathiri baadhi ya klabu kwa sababu mimi ni Simba, nitatenda haki kwa wote pasipokuwa na upendeleo wowote.”

Mulamu ameingia kwenye kinyang’anyiro hicho akiwa na mipango mikuu mitatu ambayo ni malengo ya muda mfupi, mipango ya muda wa kati na malengo ya muda mrefu ambayo anaamini ana uwezo wa kuyatekeleza kwa kipindi cha miaka minne atakayokaa madarakani kama atachaguliwa.

“Nitasimamia udhibiti wa fedha kwa kuziba mianya yote ya upotevu au matumizi ambayo hayana ulazima ndani ya shirikisho, kuongeza uwazi kwenye matumizi na mapato ya shirikisho, kuboresha ligi zetu kwenye ligi zote ambazo zinasimamiwa na TFF .

“Pia kuongeza ufanisi ambao utasaidia kuwa na ligi bora, kuifanya Bodi ya Ligi kuwa na mamlaka kamili kama kampuni isiyo na hisa chini ya shirikisho ili kuzifanya klabu ziweze kujiendesha zenyewe, kufanya marekebisho makubwa katika hosteli za TFF pamoja na mambo mengine mengi kwa faida ya soka letu.”


Shija, Mayay kuliamsha leo Dar

Tuesday August 8 2017

 

WAGOMBEA wa nafasi mbalimbali za uongozi wa TFF walianza kampeni zao jana Jumatatu ambapo kila mgombea alijichimbia sehemu yake ili kumwaga sera zake, lakini Ally Mayay na Shija Richard wanaowania kuwa Rais wa shirikisho hilo la soka wao wanaliamsha leo Jumanne. Mmoja atakuwa Sinza mwingine katikati ya Jiji la Dar es Salaam.

Wagombea hao ambao wanazungumzwa sana licha ya ugeni wao katika nyadhifa hiyo ya juu kabisa, wameliambia Mwanaspoti kwa nyakati tofauti kuwa hawaoni sababu ya wao kuwa na haraka ya kuzindua kampeni.

Mayay na Shija wanakutana na changamoto za wagombea wengine kwenye nafasi hiyo kama Wallace Karia, Stephen Mwakibolwa, Emmanuel Kimbe, Imani Madega na Fredrick Mwakalebela, lakini uwepo wa wagombea hao wengine nao umedaiwa kutowakatisha tamaa.

Shija alisema: “Nimejipanga wala sina presha, nitamwaga sera zangu kesho (leo Jumanne) kwa mara ya kwanza halafu nianze kuzunguka mtaa kwa mtaa kufanya kampeni za kisayansi, naamini wapiga kura ni werevu kitaeleweka.”

Mayay yeye alisema: “Mimi ndio nakutana na kamati yangu na kujadili kuwa kampeni nianzie wapi na wakati gani, lakini kabla ya kesho (leo) kila kitu kitakuwa wazi. Walioanza waache wafanye mimi nitafanya na nitakuwa na sera kuu tatu za msingi ambazo nina imani nitawashawishi wapiga kura na kuweza kunipigia kura.”

Uchaguzi huo unaosubiriwa kwa hamu na wadau wa soka nchini, umepangwa kufanyika Jumamosi mjini Dodoma ambapo kampeni zilizoanza jana zitamalizika Ijumaa.


Malinzi apata pigo lingine Kamati ya uchaguzi TFF yamuengua

Saturday July 8 2017

Rais wa Shirikisho la Soka Tanzania (TFF),

Rais wa Shirikisho la Soka Tanzania (TFF), Jamal Malinzi 

Dar er Salaam. Ndoto ya Rais wa Shirikisho la Soka Tanzania (TFF), Jamal Malinzi kutetea kiti chake imezikwa rasmini baada ya jina lake kuondolewa katika orodha ya wagombea wa nafasi hiyo katika uchaguzi utakaofanyika Agosti 12 mjini Dodoma.

Malinzi ambaye kwa sasa yuko rumande ameondolewa jina lake na kamati ya Uchaguzi wa TFF kwa kushindwa kudhuria katika usaili kwa mijibu wa kanuni ya 11 (7) ya uchaguzi wa TFF toleo la 2013.

Mbali ya Malinzi wengine waliondolewa katika kuwania nafasi hiyo ni pamoja na Fredrick Masolwa na John Kijumbe hajapitishwa kwa kukosa uzoefu kwa mujibu wa kanuni ya 9(3) ya uchaguzi toleo la 2013.

Kuondoka kwa Malinzi katika kinyang'anyiro hicho kimetoa mwanya kwa wagombea wengine sita kuwania nafasi ya kumrithi.

Wagombea waliopita katika usaili huo ni mwenyekiti wa zamani wa Yanga, Iman Madega, kaimu rais wa TFF, Wallace Karia, katibu mkuu wa zamani wa TFF, Fredrick Mwakalebela.

Wengine ni beki wa zamani ya Yanga, Ally Mayay, Mwanahabari Shija Richard na Emmanel Kimbe.

Katika nafasi ya makamu wa rais waliopita ni Mulamu Nghambi, Michael Wambura, Mtemi Ramadhani, Robert Selasela na Stephen Mwakibolwa wakati Geofrey Nyange 'Kaburu' akijitoa mwenyewe.

Katika mchakato huo Kamati ya Uchaguzi wa TFF chini ya mwenyekiti wake Revocatus Kuuli pia ilipitisha panga lake wajumbe wa kanda mbalimbali.

Katika wagombea wa ujumbe kanda ya Dar es Salaam imewapoteza nyota wawili wa zamani wa Simba na Yanga, Jamhuri Kihwelo, Bakari Malima wameeguliwa katika uchaguzi wa TFF kwa kushindwa kuwakilisha vyeti vyao vya elimu ya sekondari kwa kamati hiyo.

Makam Mwenyekiti kamati ya Uchaguzi (TFF), Mohamed Mchengerwa amesema wapo wagombea waliopita na wapo waliokwama kutokana na kanuni za Uchaguzi za TFF na katiba husika.

"Wale ambao hawakupata nafasi wanayohaki ya kukata Rufaa, hali kadhalika majina yaliyopitishwa sasa ni kwa ukaguzi wa elimu yao unaofanywa na wizara ya Elimu ( Uhakiki wa Vyeti).

"Katika majina ya sasa, wapo waliokatwa awali ambao tumewarejesha na wapo waliopitishwa awali ambao sasa tumewaondoa kutokana na vigezo kutofuatwa na kanuni." ilisema taarifa ya Mchengerwa.


Everton kumfuata Samatta

Tuesday June 27 2017

 

By Charles Abel

KAMA mshambuliaji, Mbwana Samatta, ataweza kuchanga karata zake vyema dhidi ya  timu ya Everton mwezi ujao, inaweza kuwa ufunguo wa ndoto zake za kucheza Ligi Kuu England iwapo atafanikiwa kuishawishi ipasavyo.

Everton ambayo mwezi ujao itakuwa nchini kucheza na Gor Mahia ya Kenya katika mechi maalumu iliyoandaliwa na kampuni ya SportPesa, imepanga kucheza mechi ya kirafiki na KRC Genk ya Ubelgiji ambayo Samatta anaichezea, ikiwa ni sehemu ya maandalizi yake kujiandaa na msimu ujao wa Ligi Kuu England.

Samatta na Genk yake watafuatwa na Everton, Julai 22 mjini Genk, ikiwa ni siku tisa tu baada ya timu hiyo kucheza na Gor Mahia jijini Dar es Salaam,  yaani Julai 13.

Hiyo itakuwa ni mara ya kwanza kwa Samatta kucheza dhidi ya timu inayoshiriki Ligi ya England licha ya kukaribia kutimiza ndoto hiyo mwezi Aprili ambapo Genk ilinusa kukumbana na Manchester United katika mashindano ya Ulaya, lakini hilo halikutimia baada ya timu yake kuondolewa na Celta Vigo kwenye hatua ya robo fainali.

Kwa mujibu wa kalenda ya mashindano hayo, Everton itaanza rasmi kambi ya maandalizi kwa ajili ya msimu ujao mwanzoni mwa mwezi Julai kabla ya kuja nchini kukwaana na Gor ambapo baada ya mchezo huo, itaenda Uholanzi itakapocheza mechi ya kirafiki na FC Twente, Julai 19 kabla ya kumalizia na Genk, Julai 22.

Timu hiyo ya Everton inatarajiwa kucheza mchezo wake wa mwisho wa kirafiki dhidi ya Sevilla, Agosti 6 kabla ya kuingia kwenye mikiki ya Ligi Kuu England ambapo watafungua dimba dhidi ya Stoke City, Agosti 12.


Wagombea TFF wazidi kumiminika

Sunday June 18 2017

 

By Mwanahiba Richard

Dar es Salaam. Mpaka leo Jumapili mchana wagombea zaidi ya 45 wamechukuwa fomu za kuwania nafasi mbalimbali ndani ya Shirikisho la Soka nchini (TFF), huku Athuman Nyamlani akichukua fomu ya kuwania nafasi ya urais.

Nyamlani sasa atavaana na Jamal Malinzi anayetetea nafasi yake, Imani Madega, Wallace Karia, Fredrick Masolwa huku Ally Mayai naye akitajwa kuwa angechukua fomu muda wowote wakati Makamu wa Rais mpaka sasa walikuwa ni Mulamu Ng'ambi, Michael Wambura na Geofrey Nyange 'Kaburu'.

Nyamlani ambaye aliwahi kuwa makamu wa rais katika uongozi wa Rais Leodeger Tenga, amechukuwa fomu hiyo leo pamoja na wajumbe watano ambao ni Abdallah Mussa, Peter Steven, Said Tulliy, Ally Musa na Mussa Kisoki.

Wajumbe waliochukuwa jana Jumamosi ni Salum Chama, Ephraim Majinge, Elias Mwanjala, Saleh Alawi, Kaliro Samson, Vedastus Lufano, Kenneth Pesambili, Mbasha Matutu, Samweli Daniel, Dunstan Mkundi, Athuman Kambi, Shafii Dauda, Golden Sanga na Charles Mwakambaya.

Wengine ni Benista Rugola, Thabit Kandoro, Goodluck Moshi, James Mhagama, Hussein Mwamba, Sarah Chao, Issah Bukuku, Stewat Masima, Emmanuel Ashery, Abdul Sauko, Musa Sima, Stanslaus Nyongo, Ayoub Nyenzi, John Kadutu, Baraka Mazengo, Khalid Mohamed, Cyprian Kayuva na Saleh Abdul.


Lipuli wanasa mkongwe Ligi Kuu

Sunday June 18 2017

 

By Thomas Ng'itu

Dar es Salaam. Mshambuliaji Benedict Ngassa aliyewahi kuzichezea klabu za Ashanti Villa Squad, Polisi Moro pamoja na timu ya Taifa ya Vijana ya Ngorongoro Heroes  yupo mbioni kujiunga na timu ya Lipuli iliyopanda daraja baada ya kufikia hatua nzuri ya  mazungumzo.

Ngassa aliliambia gazeti hili kuwa baada ya kupata ofa hiyo na kuzungumza na baadhi ya viongozi aliwaambia mahitaji yake na viongozi hao walionekana kukubaliana nae hivyo anasikilizia simu yao kwa mara ya pili.

“Nilishazungumza nao tayari kuna vitu ambavyo nimewaambia navihitaji wameonekana kabisa kukubaliana navyo, hivi sasa nasubiri tu simu yao pili kisha nijue tunafanyeje kwa ajili ya msimu ujao naamini tutamalizana,”alisema.

Aliongeza kwa kusema kuwa kuna timu zingine za ligi Daraja la kwanza zinahitaji huduma yake lakini ameona awape nafasi kubwa Lipuli iliyo katika Ligi Kuu kwa sababu anahitaji kucheza kipindi hiki kuliko Ligi Daraja la Kwanza.


Ndanda waita wachezaji uwanjani kusajili

Sunday June 18 2017

 

By Thobias Sebastian

Dar es Salaam. Katibu Mkuu wa Ndanda, Selemani Kachele alisema kuwa kesho Jumatatu Juni 19, wanatarajia kufanya majaribio saa tisa mchana, ili kupata wachezaji ambao watakaowasajili katika kikosi chao kwa ajili ya msimu ujao wa Ligi Kuu Bara.

Kachelea alisema wanatoa fulsa kwa mchezaji yoyote anayejiamini kuwa anauwezo wa kucheza Ndanda anatakiwa kuwapo leo katika Uwanja wa Nagwanda Sijaona na watasimamiwa na jopo la viongozi wa timu hiyo.

"Wachezaji ambao watakuja kufanya majaribio wanatakiwa kujigharamia malazi, kula na kulala mpaka hapo majaribio hayo yatakapomalizika ila kwa wale ambao watachaguliwa na jopo la viongozi hao gharama zitakuwa chini ya timu," alisema.

"Na tumeamua kufanya hivi ili kukwepa gharama kubwa za kusajili wachezaji ambao watakuwa wanahitaji pesa nyingi ingawa tutawasijili ili siyo wengi msimu huu ili kukwepa matatizo baina ya uongozi na wachezaji kama ilivyokuwa msimu uliopita," alisema Kachele.

Hata hivyo Kachele alisema kuwa wanaendelea kutafuta wa zamani ambao wataipa nguvu timu hiyo msimu ujao kwani msimu uliopita waliyumba katika kuendesha timu hiyo.


Taifa Stars yaanza kwa sare nyumbani

Saturday June 10 2017

 

Dar es Salaam. Tanzania 'Taifa Stars' imeanza kampeni zake za kufuzu kwa fainali za  Mataifa ya Afrika 2019, Cameroon kwa  kulazimishwa sare ya bao 1-1 na Lesotho  kwenye Uwanja wa Azam Complex Chamazi.

Stars ilikuwa ya kwanza kupata bao lililofungwa na nahodha wake Mbwana Samatta katika dakika 28 kwa mpira wa adhabu uliokwenda moja  kwa moja wavuni.

Uzembe wa mabeki wa Stars waliofanya katika dakika 35 ulitoa mwanya kwa Lesotho kusawazisha bao hilo.

Matokeo hayo yanazifanya Tanzania na Lesotho kugawana pointi moja wakati mchezo mwingine wa Kundi L kati ya Cape Verde na Uganda ukishindwa kufanyika jana.


Simba yabeba ukuta wote Stars

Saturday June 10 2017

 

By Gift Macha

SIMBA sasa inataka kuchukua umiliki wa timu ya taifa, Taifa Stars, ambapo kwanza imehakikisha safu yote ya ulinzi ya Stars ikiongozwa na kipa Aishi Manula inahamia Msimbazi kuanzia msimu ujao.

Mnyama anafanya usajili wa nguvu kujiimarisha kwa ajili ya Kombe la Shirikisho mwakani pamoja na kuhakikisha anatwaa ubingwa wa Ligi Kuu Bara msimu ujao baada ya kuukosa muda mrefu.

Wakati Yanga bado ikiwa kwenye msoto wa kiuchumi, Simba ilianza na kipa wa Stars, Aishi Manula ambaye atatambulishwa punde baada ya mkataba wake na Azam kufikia ukingoni mwezi ujao.

Manula amesajiliwa Simba sambamba na aliyekuwa nahodha wake, John Bocco.

Manula ambaye ni mshindi mara mbili mfululizo wa tuzo ya Kipa Bora wa Ligi Kuu, anakuwa mchezaji wa kwanza katika safu hiyo ya ulinzi ya Stars na usajili wake huenda utamchomoa Msimbazi, kipa Mghana, Daniel Agyei.

Simba wana mtuhumu Agyei kwamba alicheza chini ya kiwango ili Simba iondolewe kwenye michuano ya SportPesa awahi harusi ya mwenzake, James Kotei.

Taarifa ambazo Mwanaspoti inazo ni kwamba Simba ipo katika hatua za mwisho za kukamilisha uhamisho wa beki wa kati wa Stars, Salim

Mbonde ambaye mkataba wake na Mtibwa Sugar umefikia ukingoni.

Mbonde amekuwa tegemeo sasa katika kikosi cha Stars hasa baada ya wakongwe, Nadir Haroub ‘Cannavaro’ na Kelvin Yondan kutundika daluga

kuichezea timu ya Taifa huku beki mwingine wa kati, Aggrey Morris akiondolewa Stars baada ya Zanzibar kupata uanachama wa Shirikisho la Soka Afrika (CAF).

Mbonde anakuwa akicheza katika beki ya kati sambamba na kiraka wa Simba, Abdi Banda ambaye hata hivyo huenda akatimkia nchini Afrika Kusini.

Hata hivyo beki huyo huenda pia akaongeza mkataba Simba baada ya bilionea, Mohammed Dewji ‘MO’ kuingia kati usajili wake.

Wakati huo huo beki ya kushoto ya Stars sasa ipo chini ya Mohammed Hussein ‘Tshabalala’ ambaye ni beki tegemeo pia wa Simba. Tshabalala hatacheza mechi ya leo dhidi ya Lesotho kutokana na kusumbuliwa na majeraha lakini ndiye mwenye nafasi hiyo.

Beki mwingine wa kushoto, Haji Mwinyi aliyekuwa akimpa Tshabalala upinzani naye ameondolewa Stars kwani atakuwa akiichezea timu ya taifa ya Zanzibar ambayo imekuwa mwanachama wa CAF.

Simba pia ipo katika mazungumzo ya mwisho na beki wa kulia wa Azam, Shomary Kapombe ambapo muda wowote anaweza kusaini, itakuwa ni hitimisho la safu yote ya ulinzi ya Taifa Stars kuhamia Simba.

Kapombe ameahidiwa mambo mazuri na vigogo wa Msimbazi ambao wamekubaliana na dau lake pamoja na mshahara.

Lakini bado hajamwaga wino rasmi, ingawa Simba wamesisitiza kwamba hawana presha naye.

Staa mwingine wa timu ya Taifa ya Uganda, Emmanuel Okwi atasaini mkataba wikiendi hii.

Hayo yote yanafanyika ili kuhakikisha Simba inakuwa na makali ya kutosha msimu ujao kuweza kutwaa taji la Ligi Kuu Bara pamoja na kuifanya vizuri anga la kimataifa katika Kombe la Shirikisho.


Stars wana mzuka mbaya

Saturday June 10 2017

 

By Thobias Sebastian

TAIFA Stars ina kazi tatu kubwa leo Jumamosi kuanzia saa 2:30 usiku itakapovaana na Lesotho katika mchezo wa Kundi L kuwania kufuzu fainali za Kombe la Mataifa Afrika zitakazofanyika Cameroon mwaka 2019.

Katika mchezo huo utakaochezwa kwenye Uwanja wa Azam Complex, Chamazi, kazi ya kwanza itakuwa kwa kocha Salum Mayanga kuanza mechi za mashindano kwa ushindi baada ya awali kushinda mechi mbili za kirafiki dhidi ya Burundi na Botswana.

Katika mchezo huo ambao safu ya ushambuliaji itaongozwa na staa wa KRC Genk ya Ubelgiji, Mbwana Samatta na winga wa Estiklistuna ya Sweden, Thomas Ulimwengu, Stars itakuwa pia na kazi ya pili ya kuthibitisha kuwa inaweza bila kutegemea wachezaji kutoka Zanzibar ambayo imepata uanachama wa kudumu wa Shirikisho la soka la Afrika (CAF).

Kazi ya tatu ambayo ndiyo kubwa zaidi kwa Stars, wanatafuta nafasi ya kufuzu michuano hiyo ya Mataifa Afrika baada ya kukosa nafasi kwa miaka 37.

Mara ya mwisho kufuzu ilikuwa mwaka 1980.

Mechi dhidi ya Lesotho inatazamiwa kuwa mwanzo mzuri kwa Stars kupata pointi tatu kabla ya kuvaana na timu za Cape Verde na Uganda ambazo pia zipo katika kundi hilo.

Kocha wa Stars, Salum Mayanga, alisema wameupeleka mchezo huo usiku ili wachezaji waliofunga wawe wamepata chakula cha jioni huku akitamba kuwa kwa maandalizi waliyofanya, imani ya ushindi ni kubwa.

“Tulifanya mazoezi ya kutosha Misri na tumefanya kazi ya mwisho katika siku mbili za mazoezi hapa nyumbani. Wachezaji wote wako katika hali nzuri na tutapambana kuona tunapata ushindi,” alisema.

Kwa upande wake Mchambuzi wa Mwanaspoti na Azam TV, Ally Mayay alisema: “Wanachotakiwa wachezaji kwanza ni kujiamini ili kuweza kucheza kwa viwango vyao vya juu na kupata ushindi ambao utaweza kuwapa morali ya kuweza kufanya vizuri katika michezo mingine, lakini kama wakipoteza itakuwa ngumu katika michezo ijayo.”


Ndinga za wachezaji wa Singida zawasili

Saturday June 10 2017

 

By MWANAHIBA RICHARD

UONGOZI wa Singida United uliahidi kununua magari madogo kwa ajili ya wachezaji wao na sasa mambo yameiva kwani magari hayo yamewasili bandarini Dar es Salaam yakisubiri taratibu za kutolewa.

Ingawa Singida United imenunua basi kubwa kwa ajili ya timu, lakini magari hayo watapewa wachezaji ambapo watakuwa wakiyatumia kwenye shughuli zao binafsi wanapokuwa kwenye mapumziko.

Katibu Mkuu wa Singida United, Abdulrahiman Sima, ameliambia Mwanaspoti: “Tunasajili wachezaji saba wa kigeni, huo ndiyo mpango wetu na haujabadilika, hao wageni tutawapa magari ambayo tayari yameingia bado kuyatoa, ila si kwamba kila mtu atapewa gari lake bali kila gari litakuwa linatumika na wachezaji wawili ama watatu.

“Hata hawa wachezaji wazawa watapata magari ambayo pia watakuwa wakiyatumia kwa kushirikiana, tunawapa magari hayo ili kuwarahisishia kwenda kufanya shughuli zao binafsi wanapokuwa kwenye mapumziko kwani hawawezi kutumia magari ya timu kwani ni makubwa, hivyo tunafanya taratibu za kuyatoa.”


Yanga Mwanza wamtaka Manji

Monday June 5 2017

 

By Saddam Sadick, Mwananchi

Mwanza.Wazee na viongozi wa Yanga tawi la Mwanza Mjini wamesema bado wanahitaji  Mwenyekiti wao aliyejiuzuru, Yusuph Manji kubadilisha uamuzi wake.

Wakizungumza leo kwenye tawi lao, wazee na viongozi hao wamesema bado Manji anamchango mkubwa kwenye klabu hiyo, hivyo wanamuomba afute mawazo yake ya kuachia madaraka.

Mzee Mustapha Ally alisema Manji katika utawala wake ameipa matunda mema Yanga, hivyo uamuzi wa bosi huyo haafikiani nayo.

Yassin Abdalah alisema Manji atahitaji kuondoka kwenye utawala, asubiri hadi muda wake ufike kama katiba inavyoeleza.

"Kwanza sikubaliani na uamuzi wake (Manji), lakini kama anataka kuachia madaraka asubiri muda wake ufike bado tunamuhitaji Mwenyekiti wetu"anasema Abdallah.

Naye Katibu Mkuu wa tawi hilo, Mhando aliwaomba wanachama na mashabiki wa timu hiyo kuungana kwa pamoja kuhakikisha wanamshawishi Mwenyekiti huyo kubadili mawazo yake.

Alisema kuwa wao kama tawi kubwa jijini Mwanza, watahakikisha wanapambana kadri wawezavyo kupinga na kushawishi kiongozi huyo kutoachia madaraka.

"Niwaombe wanachama nchini tuungane kwa pamoja kushawishi kiongozi wetu kutoachia madaraka.. Sisi hapa Mwanza hatutakubaliana na uamuzi huo,"alisema Madega.

Nao baadhi ya wanachama walisema kuwa hawawezi kukubali kumuachia hivihivi mtu muhimu ambaye amewapa furaha muda wote kuondoka.

Salehe Akida na Suleiman Mohamed 'Sele Yanga' walisema Manji amewafanya mashabiki kujigamba na kulamba sehemu yoyote kwa ubingwa mara tatu mfululizo na kuwaacha mahasimu wao Simba wakiwaonea wivu.

"Kwa ujumla tumekuwa na kiongozi wa faida, tumekuwa na furaha muda wote kwa hiyo lazima tupambane asiondoke abaki kwenye nafasi yake"alisema Mohamed.


Beki Sakho atua Arusha

Monday June 5 2017

 

Dar es Salaam. Beki wa Liverpool anayetakiwa na Crystal Palace, Mamadou Sakho ametua Arusha akiwa njia kutembelea mbuga za wanyama.

Sakho anafuata nyayo za David Beckham aliyekuwa nchini wiki iliyopita na kutembelea mbuga ya wanyama ya Serengeti.

Sakho alipoteza mvuto katika kikosi cha Liverpool chini ya kocha Jurgen Klopp aliyeamua kumtoa kwa mkopo Crystal Palace mapema Februari.

Hata hivyo, dau la pauni 30 milioni wanalotaka Liverpool linaonekana kumshinda mwenyekiti wa Palace,  Steve Parish akisema fedha hizo nyingi kwao.


Miraj aishtukia Singida United

Monday June 5 2017

 

By Thomas Ng’itu Tng’itu@mwananchi.co.tz

Dar es Salaam. Nahodha wa African Lyon, Miraj Adam amegoma kujiunga na Singida United hadi pale atakapopewa mkataba rasmini.

Adam aliyemaliza mkataba wak na Lyon iliyoshuka daraka anatakiwa na Singida United kwa ajili ya mashindano ya SportPesa yanayoendela pamoja na Ligi Kuu msimu ujao.

Miraji alisema alikuwa katika mazungumzo mazuri na klabu hiyo, lakini kilichotokea walimtaka kujiunga kambini na wenzake moja kwa moja bila kusaini mkataba wowote kitu ambacho alikiona kama ni kigeni kwa upande wake.

Miraji pia alisisitiza kugoma kwake ni kutokana na klabu ya Simba nayo kuonyesha nia ya kumuhitaji huku akihofia kuonekana akiwa na jezi za Singida akiwa katika mashindano ya Sportpesa wakati akiwa hajasaini.

“Hakuna kabisa na dalili ya mkataba nimeona bora nitulie nisije nikafanya mambo ya ajabu katika maisha yangu ya soka,”alisema.

“Unajua unaweza ukaenda alafu wakataka moja kwa moja ucheze katika kombe hili sasa nachezaje wakati sina mkataba alafu vilevile kuna Simba nao wananitaka sasa nikionekana kule nacheza nitakuwa nimejialibia kabisa wakati huo huo sina mkataba,”alisema.

Klabu ya Singida United imewakosa wachezaji wengi kipindi hiki kutokana na falsafa yao ya kutaka kuwajalibisha wachezaji katika mashindano ya Sportpesa huku wachezaji hao wengi wakiwa wanahitajika na klabu nyingine.

 


Everton yamtaka Vardy kuzipa pengo la Lukaku

Monday June 5 2017

 

London, England. Everton inamtaka mshambuliaji wa Leicester City, Jamie Vardy kama mrithi sahihi Romelu Lukaku nayetaka kuondoka klabu hapo.

Mshambuliaji huyo Mbelgiji mwenye thamani ya pauni 70millioni amekataa kusaini mkataba mpya na  Toffees pia anatakiwa na Manchester United na klabu yake ya zamani ya Chelsea.

Gazeti la Express limeripoti kuwa kocha wa Everton, Ronald Koeman anamtazama Vardy kama ndiye mrithi sahihi wa kuziba pengo la Lukaku.

Mshambuliaji huyo wa kimataifa wa England amefunga mabao 13, msimu huu mbaya kwa baada ya kushindwa tetea ubingwa wa Ligi Kuu England.

Vardy alisaini mkataba wa miaka minne mwaka jana baada ya kukataa kujiunga na Arsenal akiwa anapokea mshahara wa pauni 100,000 kwa wiki.


Stand United kuwatema nyota 13

Monday June 5 2017

 

By Masoud Masasi,mwananchi mmasasi@mwananchi.co.tz

Mwanza. Hatima  ya wachezaji 13 wa Stand United itajulikana leo wakati benchi la ufundi la klabu hiyo utakapowasilisha taarifa yake kwa uongozi.

Stand United ilimaliza Ligi Kuu msimu uliopita ikiwa  na pointi 38, katika nafasi ya sita.

Kocha Mkuu wa timu hiyo Athumani Bilali “Bilo”alisema atakuna na uongozi wa klabu hiyo kukabidhi ripoti yake ikiwa na majina ya wachezaji 13 wanaotaka waondolewe.

Bilo alisema wachezaji watakaondoka ni wale ambao viwango vyao vimeshuka, majeruhi pamoja na wenye nidhamu mbovu.

“Kama mchezaji anajijua alikuwa na nidhamu mbovu, kiwango kilishuka au majeruhi basi ujue atakuwepo kwenye orodha ya hawa 13 tutakaowatema”alisema kocha huyo.

Hata hivyo Kocha huyo aliwapongeza mashabiki wa timu hiyo kwa kuwapa sapoti kubwa kwenye Ligi Kuu.

“Mashabiki wametupa sapoti kubwa hili lazima niseme ukweli na ndio maana umeona tumebaki Ligi Kuu ninawashukuru,” alisema Bilo.


Tanzania yathibisha Z'bar kuomba uachama Fifa

Monday June 5 2017

 

Dar es Salaam. Rais wa Shirikisho la Soka  Tanzania (TFF),  Jamal Malinzi amethibisha  Zanzibar imetuma maombi mpya ya kuwa  mwanachama wa Fifa.

Zanzibar ni sehemu ya Tanzania,  lakini ina serikali yake, na tayari Machi mwaka huu ilipata  uanachama katika Shirikisho la Soka Afrika (CAF) uliandika mtandao wa BBC Sport.

Kupata uanachama huo ilikuwa ni ndoto ya muda mrefu ya visiwa hivyo kuwa mwanachama wa  jumuiya za kimataifa ya soka na maombi ya kwanza ya kutaka uachama wa Fifa 2005 yalikataliwa.

"Kufuatia Zanzibar kupata uachama wa CAF,  sasa TFF inapeleka maombi ya  Zanzibar kuwa

 mwanachama wa Fifa," rais wa TFF, Malinzi  aliandika katika akaunti yake ya Twitter juzi  Jumapili.

Shirikisho la Soka la Zanzibar (ZFA)  tayari  limekamilisha mahitaji yanayotakiwa na nchi kuwa mwanachama Fifa kwa kuwa mwanachama wa  shirikisho la Afrika kabla ya kujiunga na shirikisho la soka ulimwenguni.

Endapo Fifa itakubali kumpokea mwanachama  wa 55 wa CAF, basi shirikisho hilo la soka duniani litakuwa na wanachama 212 duniani  kote.

Pia itawapa haki ya kupiga kura katika masuala mbalimbali ya Fifa pamoja na timu yake kushiriki mechi za kusaka kufuzu kwa fainali za Kombe la  Dunia 2022 zitakazofanyika Qatar.

Zanzibar inategemea kushiriki kwa mara ya kwanza katika mechi za kusaka kufuzu kwa fainali  za Mataifa ya Afrika 2021.

Awali Zanzibar ilikuwa ikiruhusiwa klabu zake kushiriki katika mashindano mbalimbali ya bara la

Afrika, lakini timu yao ya taifa ilikataliwa.


Simba yamtuliza Bocco

Monday June 5 2017

 

By Thobias Sebastian

Dar es Salaam.  Mabingwa wa Kombe la Shirikisho Azam,  Simba imekalisha usajili wa wachezaji watano hadi sasa katika kuhakikisha msimu ujao wanafanya vizuri katika Ligi Kuu na mashindano ya Kombe la Shirikisho Afrika.

Simba tayari imefanikiwa kuzipata saini za  wachezaji Yusuph Mlipili akitokea Toto Africans, Jamali Mwambeleko (Mbao Fc), Ahmed Msumi (Ndanda), Aishi Manula na John Bocco (wote Azam).

Mmoja wa viongozi wa Simba alisema mshambuliaji John Bocco hatajiunga na timu hiyo mpaka hapo maandalizi ya msimu ujao yatakapoanza.

"Tumeshamalizana kila kitu na Bocco ila tumemwambia atulie mpaka hapo maandalizi ya ligi yatakapoanza ila kwa sasa tutatumia wachezaji wapo kambini," alisema.

"Licha ya kukamilisha usajili wa Bocco na wachezaji wengine bado tupo katika mazungumzo ya karibu na baadhi ya wachezaji wa hapa hapa ndani na wengine nje ya nchi pia," alisema.

Simba watashuka uwanjani kesho Juni 6, kucheza na Nakuru Fc, katika mechi ya Kombe la SportPesa.

Katika mechi hiyo Simba inategemea kutumia wachezaji wake wapya Jamali Mwambeleko, Yusuph Mlipili na Ahmed Msumi.


Mwanza yataka kombe Umisseta

Monday June 5 2017

 

By Saddam Sadick, Mwananchi ssadick@mwananchi.co.tz

Mwanza. Kocha wa timu ya soka ya shule za Mkoa wa Mwanza, Michael Otieno ametamba kuondoka na ubingwa wa mashindano ya Copa Umisseta ngazi ya Taifa yatakayoanza kesho Jumanne jijini Mwanza.

Mashindano hayo yatafanyika kwenye Viwanja vya Chuo cha Ualimu Butimba, yatashirikisha Mikoa yote ya Tanzania Bara na Visiwani.

Otieno alisema kuwa wamejiandaa vizuri kuhakikisha wanatwaa ubingwa kwenye soka na kwamba hakuna Mkoa unaompa wasiwasi.

Alisema kuwa vikosi vyake viwili (Wasichana na Wavulana) viko tayari kwa mapambano ila atawakosa wachezaji wawili kwenye kikosi cha wavulana.

Aliwataja watakaokosa mechi za kesho kuwa ni mshambuliaji Omary Shabani na kiungo mchezeshaji Josephat John wote majeruhi.

“Naamini wachezaji wangu hawatamuniangusha kwani amewafua vya kutosha na sasa tusubiri kujua nani tunaanza naye."


Hazard afungua milango kwa Real Madrid

Monday June 5 2017

 

London, England. Eden Hazard ameiweka  Real Madrid katika mkao wa kula baada ya

kukiriku anaweza kuondoka Chelsea.

Kiungo huyo wa Blues amereja katika ubora wake na Antonio Conte kunyakuwa taji la Ligi Kuu England katika msimu wake wa kwanza.

Zinedine Zidane anajulikana kuwa ni mpenzi  mkubwa wa Mbelgiji huyo na amekuwa  akichochea tetesi za kumuahamishia Bernabeu.

Hazard alisema: “Kuondoka Chelsea? Uwezi  kusema kamwe hatitatokea katika soka, lakini kwa sasa siyo jambo ambalo lipo kichwani  mwangu.

“Wote tunandoto zetu. Bado sijazungumza na  Chelsea.

“Niwe muazi kabisa, Sijui ni ofa gani  itakayokuja. Ninachokijua ni kwamba bado nina mkataba wa miaka 3 na Chelsea.”

Hazard amekuwa akihusishwa na kujiunga na mabingwa hao wa Ulaya mara 12, tangu 2015 alipochukua ubingwa na Chelsea.


Atletico ikitoka kifungo Torres wa kwanza kutimka

Sunday June 4 2017

 

By Mexico


Kichaa apewa rungu! Wenger apewa Pauni 165 milioni asajili

Sunday June 4 2017

 

By London, England


Tuzo ya Ballon d’Or yanukia kwa Ronaldo

Sunday June 4 2017

 

By Hispania.


Mashabiki 400 wa Juventus waanguka kwa presha Turin

Sunday June 4 2017

 

By Hispania


Rais wa Real Madrid amtosa De Gea

Sunday June 4 2017

 

By Madrid, Hispania.